Ahalyň täze dolandyryş merkezi Arkadag şäheri diýlip atlandyryldy
Arkadag şäheri – Ahal welaýatynyň täze dolandyryş merkezini şeýle atlandyrmak barada karara gelindi. Bu ýerde çarşenbe güni hökümetiň göçme giňişleýin mejlisi geçirildi. Bu baradaky çözgüdi Mejlisiň – türkmen parlamentiniň deputatlar palatasynyň başlygy Gülşat Mämmedowa habar berdi.
Mejlisiň degişli karary bilen tanyşdyryp, onuň ýolbaşçysy resminama kabul edilende welaýatyň we ýurduň ähli sebitleriniň ýaşaýjylarynyň isleg-arzuwlarynyň, şeýle hem jemgyýetçilik guramalarynyň teklipleriniň göz öňünde tutulandygyny aýtdy.
Türkmenistanyň dolandyryş-çäk gurluşynyň meselelerini çözmek baradaky tertibi baradaky kanuna esaslanan resminama laýyklykda, Ahal welaýatynyň dolandyryş merkezi resmi taýdan Arkadag şäherine geçirilýär. Degişlilikde, Ahal welaýatynyň Gökdepe etrabynyň 2 müň 370 gektar meýdany Arkadag şäheriniň dolandyryş-çägine geçýär.
Çäkleriň Arkadag şäherine birikdirilmegi bilen baglylykda, Halkara ahalteke atçylyk sport toplumynyň atşynaslary üçin gurulan Aba Annaýew obasy dolandyryş-çäk birikleriniň sanawyndan aýrylýar, bu obanyň ozal degişli bolan Kärizek geňeşligi bolsa ýatyrylýar.
Oba hojalyk we daşky gurşawy goramak Ministrligine Ahal welaýatynyň häkimligi bilen bilelikde Arkadag şäheriniň dolandyryş çäkleriniň resminama ýazgylaryny taýýarlamak tabşyryldy.
ORIENT news
