Hazaryň kenarynda täze syýahatçylyk klasteri peýda bolar
Russiýanyň Federal hökümeti Dagystan Respublikasynyň hökümeti bilen bilelikde ýörite ykdysady zolagy ösdürmek boýunça konsepsiýany işläp düzmäge we “Hazar kenarýaka klasterini” döretmäge girişdi.
Bu barada Russiýanyň Ykdysady ösüş ministriniň orunbasary Sergeý Nazarow Demirgazyk Kawkaza eden iş saparynyň jemleri boýunça mälim etdi – diýip, ykdysady ösüş ministrliginiň resmi saýtynda habar berilýär.
Derbent etrabynyň çägindäki ýörite ykdysady zolagyň syýahatçylyk klasteriniň meýdany 200 gektardan gowrakdyr. 2026-njy ýyla çenli uzynlygy 6 km bolan kenar zolagyny abadanlaşdyrmak, döwrebap syýahatçylyk infrastrukturany döretmek göz öňüne tutulýar. Taslamanyň durmuşa geçirilmegi Dagystanda syýahatçylyk pudagyny ösdürmekde azyndan 50 mlrd rubl möçberde maýa goýumy zerur bolup biler – diýip, Sergeý Nazarow belledi.
Şunlukda, ministrlik Dagystanyň ýörite ykdysady zolagynyň çäklerindäki kenarýaka zolagyny ähli möwsümde işlejek syýahatçylyk-dynç alyş toplum “Hazar kenarýaka klasterini” ösdürmegiň esasy görkezijilerini eýýäm kesgitledi - diýip, ol belläp geçdi.
Şu kararyň çäklerinde syýahatçylyk infrastrukturanyň täze desgalarynyň gurluşygy üçin ýaramly meýdançalary kesgitlemek üçin ýörite iş topary dörediler.
ORIENT habarlar
Surat: golosstepi.ru
