Türkmen talyby "Meniň myhmanym bol" atly hytaý wideoserialynyň gahrymany boldy we mýao halkynyň obasyna baryp gördi
Hytaýyň Guýçžou welaýatynyň hemra teleýaýlymy "Meniň myhmanym bol" atly gysga wideoserialy ýaýlyma berdi. Filmiň baş gahrymany daşary ýurduň raýaty, ony syýahatçy hökmünde Guýçžou welaýatyna çagyrýarlar we hakyky durmuş ýagdaýynda surata düşürilýän filmde täze bir sebitde bolmakdan özünde galýan täsirler we duýgular bilen paýlaşmagy hödürleýärler.
Guýçžou Tehnologiýa Institutynyň türkmenistanly talyby Döwlet "Meniň myhmanym bol" atly serialyň bir bölümine gatnaşdy. Onuň syýahaty we ýerli medeniýet, däp-dessurlar bilen tanyşlygy Hytaýyň mýao halkynyň ýaşaýan Taýszýan günorta etrabynda bolup geçdi.
Türkmen ýigidi ol ýerde ýerli ilatyň meşhur senedini – mýao nagyş sungatyny özleşdirdi. Oňa bu gadymy sungaty obalaryň birinde ýaşaýan halk ussady öwretdi. Döwlet ýaşaýjylaryň milli tagamlarynyň birini – turşy balyk çorbasyny dadyp gördi, oba basketbolçylary bilen oýun oýnady we "gündogar diskosy" diýlip atlandyrylýan agaç deprekli gadymy tansy ýerine ýetirdi.
“Uzakdan gelen myhman hökmünde, men Taýszýan etrabynda düýpgöter üýtgeşik durmuşyň bardygyna göz ýetirdim we Guýçžou halklarynyň täsin medeniýeti meni haýran galdyrdy. Men Hytaýyň bu welaýatynyň beýleki ýerlerine baryp, ýerli däp-dessurlar bilen tanyşmaga, özüm üçin özboluşly gaýtalanmajak medeniýeti bolan täze ýerleri açmaga howlukýaryn" – Döwlet teletaslamada öz duýgulary bilen paýlaşýar.
ORIENT news
