Ankara, Aşgabat we Baku türkmen gazy boýunça iş toparyny dörederler
“Biz üç ýurduň bähbidi üçin türkmen gazy boýunça bilelikdäki ädimleri ätmäge taýýar we bu mesele boýunça iş toparyny döretmek kararyna geldik. Energetika babatda hyzmatdaşlygy mundan beýläk-de ösdürmek hakynda Türkmenistanyň, Azerbaýjanyň we Türkiýäniň hökümetleriniň arasynda gol çekilen özara düşünişmek hakynda Ähtnama iş toparynyň döredilmegi üçin zerur binýat bolup durýar" – diýip, CNN türk teleýaýlymy öz saýtynda Çawuşoglunyň sözlerini getirýär.
Çawusoglu Türkmenistanyň Daşary işler ministri Raşid Meredowyň we Azerbaýjanyň Daşary işler ministri Jeýhun Baýramowyň gatnaşan metbugat ýygnagynda: “Sammitde kabul edilen bilelikdäki beýannamada döwletlerimiziň baştutanlary hyzmatdaşlygymyzy iň ýokary derejede ösdürmäge bolan erk-isleglerimizi aýratyn nygtap geçdiler. Biz şu wagt energetika, söwda we ykdysadyýet, gümrük, ulag, ylym, bilim we medeniýet ýaly ugurlarda 5 sany resminama gol çekdik" – diýdi.
Energiýa hyzmatdaşlygyny ösdürmek meselesi sammitiň gün tertibinde iň möhüm meseleleriň biri boldy. “Çeşmeleriň we ugurlaryň diwersifikasiýasy energiýa howpsuzlygy üçin öräm möhüm ähmiýete eýe boldy. Bu ýagdaý Hazar basseýniniň çeşmelerini öňe çykardy. Biziň geografiki ýagdaýymyz adam we tebigy baýlyklarymyz birleşdirilende, biziň nähili güýje eýe boljakdygymyzy görkezýär" – diýip, Çawuşoglu aýtdy.
ORIENT news
