Türkiýe Türkmenistandan Ýewropa gaz ibermegiň ýol kartasyny tiz wagtda işläp düzmäge söz berdi
Türkmen gazyny Ýewropa ibermegiň ýol kartasy ýakyn wagtda işlenip düzüler. Bu barada Türkiýäniň energetika ministri Fatih Dönmez «A Heber» teleýaýlymyndaky çykyşynda belledi – diýip, TASS habar berýär.
«Ýol kartasy ýakyn wagtda taýýar ediler diýip umyt edýärin. Bu meseläni işläp düzmek üçin iş topary döredildi, işler tizleşdiriler» – diýip, energetika ministri nygtamak bilen, mawy ýangyjy Türkmenistandan Türkiýä we ondan aňryk Ýewropa ibermegiň meýilnamasy barada gürrüň berdi.
Öň Türkiýäniň Prezidenti Rejep Taýyp Ärdogan türkmen mawy ýangyjynyň Türkiýä ibermek mehanizminiň bir aýyň dowamynda işlenip düzüljekdigini aýdypdy.
Köpçülige beýan edilen meýilnamalara görä – Türkmenistan, Türkiýe we Azerbaýjan ilki gazy daşary ýurda satmak meselesini üçtaraplaýyn ölçegde işläp düzerler, soňra türk tarapy ÝB bilen gepleşikleri geçirer.
ORIENT habarlar
Surat: Middle East Monitor
