Türkiýe Hazaryň üsti bilen türkmen gazynyň iberilmegine umyt edýär
“Awazadaky sammit biziň tagallalarymyzyň soňkusydyr we anyk mysalydyr. Energetika, ulag we täjirçilik meseleleri biziň sammitimizň gün tertibiniň esasy ugurlary bolar. Şu sebäpli biz gatnaşyklarymyzyň hukuk esaslaryny berkitmek üçin dürli ylalaşyklara hem gol çekeris” diýip, Rejep Taýyp Ärdogan sişenbe güni Türkiýe-Azerbaýjan-Türkmenistan sammitiniň öňüsyrasyndaky metbugat-maslahatynda aýtdy.
“Şeýlelik bilen, biz energetika, ulag, söwda, ykdysadyýet, gümrük, bilim, ylym we medeniýet ulgamlaryna jogap berýän düzümlerimiziň arasynda hyzmatdaşlyk etmegiň netijeli gurallaryny goldarys” diýip, ol sözüniň üstüni ýetirdi.
Awazadaky sammitiň esasan tebigy gaz babatda öňe tarap ädim ätmäge gönükdirilendigi barada pikirini beýan edip, Ärdogan: “Ine, şonuň üçin meniň energetika we tebigy serişdeler ministrim bu sammitde ýanymyzda bolar. Biziň şol ýerde bu barada gürrüňlerimiz bolar” diýip aýtdy.
Žurnalistiň Türkiýäniň türkmen gazyny dünýä bazaryna üstaşyr ibermegiň alternatiw ugurlarynyň biri bolup biljekmidigi baradaky sowalyna jogap berip, Ärdogan bu baradaky meseläni türkmen kärdeşi Berdimuhamedow bilen ozal ara alyp maslahatlaşandygyny aýtdy.
“Biz bu meseläni sammitde ara alyp maslahatlaşarys. Türkmen gazynyň biziň ýurdumyza Hazaryň üsti bilen iberiljekdigine umyt edýärin” diýip, Ärdogan žurnalistlere aýtdy.
ORIENT news
