Türkmenistanyň we Russiýanyň parlamentara toparynyň ilkinji mejlisi 2023-nji ýylyň aprelinde geçiriler
Türkmenistanyň we Russiýanyň parlamentara toparynyň ilkinji mejlisi 2023-nji ýylyň aprelinde Moskwada we Astrahanda geçiriler. Bu barada Aşgabatda resmi sapar bilen bolan RF-niň Federasiýa Geňeşiniň başlygynyň orunbasary Konstantin Kosaçew aýtdy diýip, TASS habar berýär.
Kosaçew häzirki wagtda toparyň gün tertibiniň doly ylalaşylandygyny belledi. Ondaky meseleler toparyň ygtyýarlyklaryny ara alnyp maslahatlaşyljak wezipeleriň toplumyny we hemme guramaçylyk taraplaryny kesgitleýär. “Hususan-da, biz toparymyzyň mejlisini ýylda iki gezek – gezekli-gezegine Türkmenistanda we RF-de geçirmegi ylalaşdyk. Munuň özi yzygider gatnaşyklaryň mümkin bolan derejesidir” diýip, rus wise-spikeri düşündirdi.
Onuň sözlerine görä, topar ykdysady hyzmatdaşlyk boýunça meseleleri parlament gözegçiligine alar. “Iki ýurtda hereket edýän kadalaşdyryjy-hukuk binýadyny kämilleşdirmeli bolar. Käbir ýagdaýlarda soňra gol çekmek üçin käbir hökümetara ylalaşyklaryny taýýarlamagyň talap edilmegi mümkin. Biz şu meseleleriň ählisi boýunça işlemäge goşulşarys.” diýip, Konstantin Kosaçew belledi.
Topar Türkmenistanyň parlamentiniň ýokary palatasynyň başlygy Gurbanguly Berdimuhamedowyň Moskwa bolan saparynyň barşynda 2022-nji ýylyň noýabrynda döredildi. Russiýanyň Federasiýa Geňeşiniň başlygy Walentina Matwiýenko bilen bolan duşuşygyň netijeleri boýunça “Parlamentara toparyny döretmek hakynda” ylalaşyga gol çekildi.
-Ikinji mejlis geljek ýylyň sentýabrynda Aşgabatda we Türkmenbaşyda geçiriler - diýip, Federasiýa Geňeşiniň wise-spikeri gürrüň berdi.
Orient news
