Aşgabatda jemgyýetçilik guramalaryň Forumy geçirildi
Türkmenistanyň jemgyýetçilik guramalarynyň Forumy raýat jemgyýetçiliginiň, işewür toparlarynyň we döwlet häkimiýetiniň wekilleriniň gatnaşyk etmegi üçin nobatdaky mümkinçilige öwrüldi. Oňa Türkmenistanyň Mejlisiniň, Zähmet we ilaty durmuş taýdan goramak ministrliginiň, Saglygy goraýyş we derman senagaty ministrliginiň, Adalat ministrliginiň, Bedenterbiýe we sport baradaky komitetiniň hem-de paýtagtyň häkimliginiň bilermenleri gatnaşdylar.
Duşuşyk anna güni Aşgabatda geçirildi. Forumda ekologiýa, aýal-gyzlaryň, çagalary we ýetginjekleriň bähbitlerini öňe ilerletmek, telekeçilik işlerini ösdürmek, durmuş we konsalting hyzmatlaryny hödürlemek ulgamlarynda we birnäçe beýleki möhüm ugurlarda işleýän jemgyýetçilik guramalry tejribelerini hem-de işläp taýýarlamalaryny paýlaşdylar.
Maslahat gatnaşyjylar intellektual, işgärler we maglumat ulgamlarynda toplan tejribelerini ulanyşlary barada gürrüň berdiler. Hususan-da, olar döwlet edaralaryna raýat jemgyýetiniň institutlary bilen hyzmatdaşlyk gatnaşyklarynyň häzirki zaman guralyny döretmäge ünsi jemlemegi, özara ynamy artdyrmak üçin durmuş taýdan hyzmatdaşlygy ösdürmegiň çeýe görnüşlerini we netijeli usullaryny işläp taýýarlamagy teklip etdiler.
Şeýle hem Forumda häzirki zaman sanly giňişlikde zenanlaryň eýeleýän orny, maşgala gymmatlyklaryny berkitmek boýunça ýaşlar bilen işlemek, telekeçilikde, işe ýerleşmekde zenanlaryň hukuklary we mümkinçilikleri ýaly wajyp meselelere we beýlekilere garaldy. Şu işlerde jemgyýetçilik guramalarynyň eýeleýän ornunyň jedelsizdigi bellenildi.
ABŞ-nyň Halkara ösüş boýunça agentliginiň (USAID) Türkmenistandaky “Döwlet dolandyrylyşyny kämilleşdirmäge ýardam bermek” (Governance Support Program, GSP) taslamasynyň goldaw bermeginde “Ýenme” JG-si Forumyň guramaçysy bolup çykyş etdi.
Orient news
