Miller we Erdogan gaz merkezini döretmegiň geljegini ara alyp maslahatlaşdylar
Türkiýäniň Prezidenti Rejep Taýyp Erdogan bilen Russiýanyň “Gazprom” energetika kompaniýasynyň ýolbaşçysy Alekseý Miller türk sarp edijilerine russiýa gazynyň berilmegi, şeýle hem gaz merkezini döretmegiň geljegi barada pikir alyşdylar – diýip, kompaniýa öz wekiliýetiniň Türkiýä iş saparynyň netijeleri boýunça habar berýär.
–“Gazprom”-yň resmi Telegram kanalynda "Duşuşykda türk sarp edijilerini russiýa gazy bilen üpjün etmek, şeýle hem Türkiýede gaz merkezini döretmegiň geljegi bilen baglanyşykly meseleler ara alnyp maslahatlaşyldy" – diýlip bellenýär.
Ozal Rejep Taýyp Erdogan 14-nji dekabrda Awazada geçiriljek üçtaraplaýyn Türkiýe-Türkmenistan-Azerbaýjan sammitinde öz ýurdunyň çäginde gaz merkeziniň döredilmegi barada meseleleri ara alyp maslahatlaşmagy meýilleşdirýändigini aýdypdy.
Türkiýäniň Daşary işler ministriniň orunbasary Sedat Onal şu gün Türkiýe Milli mejlisiniň Daşary gatnaşyklar boýunça komitetinde eden çykyşynda türkmen tebigy gazynyň merkez ulgamyna girizilmeginiň möhümdigini nygtady. Ol Hazar deňzinden geçýän geçelgeleriň möhüm ähmiýete eýe bolandygyny belläp, Türkmenistanyň bu ugurda ulag, söwda we energetika ugurlary üçin strategiki amatly ýerde ýerleşýändigini, şeýle hem tebigy gaz gorlary bilen dünýäde dördünji ýerde durýan iri energiýa eksport edijisi bolup durýandygyny belläp geçdi.
ORIENT news
