Türkmen kompaniýasy Täjigistanda mekdebiň gurluşygyna başlaýar
Türkmenistan Täjigistanyň Hatlon oblastynda umumybilim berýän orta mekdebiň binalar toplumynyň gurluşygyna girişýär.
Anna güni Prezident Serdar Berdimuhamedowyň gol çeken kararyna laýyklykda, Duşenbe şäherinde türkmen ilçihanasynyň buýurmasy boýunça mekdebi bu taslama üçin geçirilen bäsleşikde ýeňiji bolan “Döwlet gurluşyk” hojalyk jemgyýeti gurar.
540 orunlyk umumybilim berýän edara türkmenleriň kowçum bolup ýaşaýan ýeri bolan Dusti raýonynyň “Ergeş Sultanow” obasynda bina ediler. Mekdep türkmen şahyry Magtymgulynyň adyny göterer. Onuň gurluşygyna şu aý başlanylar, gurluşygy 2024-nji ýylyň dekabrynda tamamlamak maksat edinilýär.
Şeýle hem şu kompaniýa – “Döwlet gurluşyk” şu möhletde Türkmenistanyň we Özbegistanyň hökümetleriniň arasyndaky Ylalaşyga laýyklykda bölünip berlen ýer böleginde Türkmenistanyň Daşkentdäki ilçihanasynyň işgärleri üçin 12 öýi bolan ýaşaýyş jaýyny bina eder.
ORIENT news
