Türkmen wekiliýetiniň Moskwa bolan saparynyň dowamynda ikitaraplaýyn resminamalaryň 15-sine gol çekildi
Çarşenbe güni Moskwada wise-premýerler Raşid Meredowyň we Alekseý Owerçugyň başlyklyk etmeginde Ykdysady hyzmatdaşlyk boýunça Türkmen-Rus hökümetara toparynyň 12-nji mejlisi geçirildi.
Soňky ýyllarda kuwwatly itergä eýe bolan türkmen-rus söwda-ykdysady hyzmatdaşlygynyň ýagdaýyna we geljegine garaldy.
“Gepleşikler dürli ugurlarda hyzmatdaşlyk gatnaşyklaryny giňeltmäge, täze ugurlara çykmaga ikitaraplaýyn gyzyklanmany tassyklady” diýlip, türkmen DIM-niň metbugat gullugynyň habarynda aýdylýar.
Ýangyç-energetika toplumy, ulag, senagat ulgamlary, oba hojalygy, gurluşyk, saglygy goraýyş ýaly pudaklar ileri tutulýan ugurlaryň hatarynda görkezilendigi bellenildi. Medeni-ynsanperwer gatnaşyklara hem üns berildi.
Wekiliýetleriň baştutanlary iki ýurduň prezidentleriniň tabşyryklaryna laýyklykda ähli ugurlar hem-de Türkmenistan bilen Russiýa Federasoýasynyň arasyndaky strategik hyzmatdaşlygyň mazmuny boýunça gatnaşyklaryň ösdürilmegi ugrunda pikirlerini aýtdylar.
Türkmen wekiliýetiniň Moskwa iki günlük saparynyň netijeleri boýunça ikitaraplaýyn resminamalaryň 15-sine, şol sanda Türkmenistan we Russiýa Federeasiýasynyň Daşary işler ministrlikleriniň arasynda 2023-2024-nji ýyllarda hyzmatdaşlyk etmegiň maksatnamasyna, ykdysady, ylmy-tehniki we ynsanperwer ulgamlarda ylalaşyklara gol çekildi.
Saparyň çäklerinde iki ýurduň ugurdaş ministrliklerinniň we pudaklaýyn dolandyryş edaralarynyň arasynda birnäçe duşuşyklar geçirildi.
ORIENT news
