Dostluk ýatagynyň özleşdirilmegi Hazarüsti birleşdiriji gaz geçirijisi boýunça başlangyja badalga bolup biler
Türkmenistanyň DIM-niň ministr Raşid Meredowyň Bakuda Azerbaýjanyň Prezidenti Ylham Alyýew we respublikanyň Ykdysadyýet ministri Mikail Japbarow bilen gepleşikleri geçirendigi baradaky habaryna salgylanýan ИА Neftegaz.RU - “Dostluk ýatagynyň özleşdirilmegi Hazarüsti birleşdiriji gaz geçirijisi boýunça başlangyjyň durmuşa geçirilmegine badalga bolup biler” – diýip, hasaplaýar.
–Bilermenleriň birnäçesiniň pikiriçe, Hazar deňzindäki Dostluk nebit-gaz ýatagyny taraplaryň bilelikde özleşdirmegi baradaky hökümetara ylalaşyga 14-nji dekabrda geçiriljek üçtaraplaýyn sammitde gol çekilmegi mümkin – diýip, agentlik indiki hepde Türkmenistanyň, Azerbaýjanyň we Türkiýäniň Prezidentleriniň Awazadaky duşuşygyny göz öňünde tutmak bilen, habar berýär.
Dostluk suwasty nebitgaz käni Azerbaýjan bilen Türkmenistanyň deňiz serhedinde ýerleşýär. 1986-njy ýylda üsti açylan bu ýatagyň dürli çaklamalara görä, nebit gorlary 60 million tonna, tebigy gaz - 100 milliard kubmetre barabardyr.
Uglerod ýatagynyň eýeçiligi uzak wagt bäri jedelli mesele bolup, 2021-nji ýylyň ýanwar aýynda Türkmenistan bilen Azerbaýjan Hazar deňzindäki Dostluk ýatagyny bilelikde gözlemek, işlemek we özleşdirmek boýunça özara düşünişmek hakynda memoranduma gol çekdiler.
Azerbaýjan parlamenti 2021-nji ýylyň fewralynda, Türkmenistan bolsa - 2021-nji ýylyň martynda bu memorandumy tassyklady.
LUKOIL 2021-nji ýylyň fewralynda Dostluk ýatagynyň özleşdirilmegine gatnaşmak isleýändigini mälim etdi. Şol ýylyň sentýabr aýynda Wagit Alekperow LUKOIL-yň rus kompaniýalarynyň arasynda Hazarda iň güýçli orny eýeleýändigini we onuň Dostluk känini özleşdirmäge gyzyklanma bildirýändigini ýatlatdy.
ORIENT news
