Türkmenistan benziniň we dizel ýangyjynyň bahalarynyň elýeterliligi boýunça dünýäde öňdebaryjy orny eýeledi
Benziniň we dizel ýangyjynyň bahalarynyň elýeterliligi boýunça halkara sanawynda Türkmenistan öňdebaryjy orny eýeledi. Bu barada GlobalPetrolPrices neşiri habar berýär.
Ýagny, 1 litr benziniň bahasy 0,433 amerikan dollaryna deň bolup, bu nebit önüminiň bahasynyň elýeterliligi boýunça Türkmenistan dünýäde 7-nji orunda mynasyp boldy. Dünýäde benziniň iň elýeterli bahadan satylýan ýeri Wenesueladaky ýangyç guýulýan beketler bolup, onda 1 litr benziniň bahasy 0.016 amerikan dollaryna barabar, benziniň iň gymmat bahadan satylýan ýeri bolsa Gonkong şäheridir, ol ýerde 1 litr benziniň bahasy 3 amerikan dollary töweregidir.
Şeýle hem Türkmenistanda 1 litr dizel ýangyjynyň bahasy 0.390 amerikan dollary bolup, dünýäde dizel ýangyjynyň bahalarynyň elýeterliligi boýunça şuňa meňzeş halkara sanawynda 9-njy orny eýeleýär. Dizel ýangyjynyň iň arzan bahadan satylýan ýeri Eýran bolup, onda 1 litr dizel ýangyjynyň bahasy 0.011 amerikan dollaryna deň, onuň iň gymmat bahadan satylýan ýeri bolsa Gonkong şäheri bolup, ol ýerde 1 litr dizel ýangyjynyň bahasy 2.726 amerikan dollaryna barabar.
ORIENT news
Surat: redaksiýa arhiwi
