Ýewropada howanyň sowamagy we ýelden energiýa öndürmegiň gowşamagy sebäpli, gazyň bahasy ýokarlanýar
ICE biržasynyň maglumatlaryna görä, çarşenbe güni Ýewropada ýanwar aýy üçin gaz üpjünçiligi baradaky şertnamalar (fýuçersler) her 1000 kubmetr üçin ABŞ-nyň 1500 dollaryndan gowrak bahadan satyldy. TTF (Niderlandlarda ýerleşýän Ýewropanyň iň uly gaz merkezi) indeksi boýunça ýanwar fýuçersleri 1489 dollara deň bolan baha bilen (-1%) söwdany açdylar. Şol gün günortan Ýewropada gazyň bahasy 1514,5 dollara (+ 0.7%) barabar boldy.
13-nji oktýabrdan bäri ICE biržasynda ilkinji gezek 1-nji dekabrda ýakyn geljek üçin fýuçersleriň bahasy 1700 dollardan geçdi (1780 dollara barabar boldy). Ýewropadaky bahalar howanyň sowamagy we ýelden energiýa öndürmegiň gowşamagy sebäpli ýokarlandy.
KHBS Ýewropada bahalaryň ýokarlanmagyndan soň, Aziýada hem gazyň bahasynyň gymmatlandygyny bellediler. JKM Platts indeksiniň fewral aýy üçi fýuçers bahasy 1302 dollara bardy.
Germaniýanyň Federal tor agentligi ýurtdaky howa ýagdaýa baha berlişini "dartgynlydan" "agyr" diýen derejä üýtgetdi. Agentlik ýakyn ýedi günüň dowamynda howanyň temperaturasynyň soňky dört ýyldaky (2018-2021) ortaça temperaturasyndan ýokary boljakdygy çaklanylanda, ýagdaýy "durnukly" diýip atlandyrýar, eger ondan 0-2 dereje pes bolsa, "dartgynly" we şol döwür bilen deňeşdirilende, adaty derejeden iki dereje pes bolsa, "agyr" diýip belleýär.
Germaniýanyň Federal tor agentligi “Bu hepdä çaklama howanyň soňky dört ýyldaky ortaça temperaturasyndan 2,38 gradus pes, şonuň üçin sarp edişiň ep-esli ýokarlanmagyna garaşylmalydygyny” duýdurýar.
