Arkalaşygyň ýurtlarynyň lukmanlary saglygy goraýyş işgärleriniň psihiki-emosional ýadawlygy baradaky meseleleri ara alyp maslahatlaşdylar
Lukmanlaryň we orta derejeli lukman işgärleriň arasynda psihiki-emosional ýadawlygyň sindromy, giňden ýaýran ruhy çökgünligiň ýokary derejesi, aladalar, kynçylyklar we emosional näsazlyklar saglygy goraýyşy guramagyň we maglumatlaşdyrmagyň rus merkezi ylmy-barlag instituty tarapyndan başy başlanyp guralan tegelek stoluň esasy meseleleri boldy. Bu edara GDA gatnaşyjy döwletleriň jemgyýetçilik saglygynyň we saglygy goraýyşyň habarlarynyň binýatlyk guramasy bolup durýar diýip, mednet.ru neşiri ýazýar.
Lukman işgärleriniň hünär taýdan işleri hemişelik fiziki we emosional stres bilen baglanyşyklydyr, COVID-19 pandemiýasy döwründe bolsa lukman işgärlere täsir edýän ýaramaz ýagdaýlar ep-esli güýçlendi, muny aýratyn-da, “howply zolakda” işlän lukmanlar duýdular.
Bu meseläni ara alyp maslahatlaşmak hem-de ony çözmegiň ýollaryny tapmak üçin bu duşuşyk guraldy. Onda gatnaşyjylar ruhy taýdan ýadawlygyň öňüni almak, ruhy taýdan ýadawlygy ýeňip geçmekde lukman işgärlerine kömek bermegiň usullary we görnüşleri baradaky maglumatlary paýlaşdylar, şeýle hem COVID-19 pandemiýasy döwründe lukman işgärleriniň töwekgelçiligini we alyp barýan işlerinde adatdan daşary ýadawlygynyň ýaýraýşyny öwrenmek boýunça geçirilen milli barlaglaryň netijelerini görkezdiler.
Çärä GDA ýurtlarynyň, BSGG-niň Ýewropa sebit edarasynyň, W.P. Serbskiý adyndaky psihiatriýa we narkologiýa milli lukmançylyk barlak merkeziniň (psihiatriýa we narkologiýa ulgamynda GDA gatnaşyjy döwletleriň binýatlyk guramasy) we Arkalaşygyň Ýerine ýetiriji komitetiniň wekilleri gatnaşdylar.
ORIENT news
