Türkmenistanyň Döwlet daşary ykdysady iş banky we ITFC guramasy Yslam maliýeleşdirilişi boýunça seminar geçirýär
Türkmenistanyň Döwlet daşary ykdysady iş banky we Halkara yslam söwda-maliýe korporasiýasy (ITFC) ilkinji gezek bilelikde Türkmenistanyň maliýe edaralarynyň wekilleri üçin ýörite Yslam maliýeleşdirilişi boýunça seminar geçirýärler. Bu barada ORIENT-iň habarçysy habar berýär.
«Okuw sapagy yslam ýurtlarynyň bank ulgamynyň esasy ýörelgelerine we gurallaryna bagyşlanýar. Sapagyň maksady Türkmenistanyň eksport kuwwatyny has ýokarlandyrmaga ýardam bermekden, onuň aýratynlyklaryna düşünmekden we yslam maliýe guramalarynyň hereket edýän täze bazarlaryny açmakdan ybaratdyr. Mysal üçin, Arap ýurtlarynda, Aziýa we Afrika döwletlerinde» - diýip, ITFC-niň toplumlaýyn söwda çözgütleriniň dolandyryjysy Jarilkasin Ylýasow belledi.
Bu seminar okuwy Türkmenistanda Yslam maliýe ulgamyny mundan beýläk-de ösdürmegi we halkara söwdany güýçlendirmek üçin döredilen yslam maliýe önümleri we hyzmatlary boýunça dürli okuw sapaklaryny öz içine alýar.
Yslam bankynyň amaly we düzgünleşdiriş işlerine, şeýle hem yslam maliýe esaslaryna bagyşlanan amaly okuw sapaklaryna Yslam maliýe ulgamy boýunça öňdebaryjy hünärmenler Kazimhan Turaýew we Talanta Kerimbaýew ýolbaşçylyk edýärler.
2021-nji ýylyň dekabrynda Türkmenistanyň hökümeti we ITFC üç ýyl möhlet bilen esasy harytlary import etmek, oba hojalygyna we dokma senagatyna goldaw bermek we hususy pudakda maliýeleşdirmegi üpjün etmek babatynda ikitaraplaýyn hyzmatdaşlygy öz içine alýan bahasy 150 million amerikan dollary bolan çarçuwaly şertnama gol çekdiler.
Şu ýylyň maý aýynda Türkmenistanyň Döwlet daşary ykdysady iş banky hususy türkmen kärhanalarynyň eksporta gönükdirilen taslamalaryny ITFC-niň hasabyna daşary ýurt walýutasynda maliýeleşdirmek üçin arzalary kabul edýändigini yglan edipdi.
ORIENT news
Redaksiýanyň suraty
