«Türkmenfilm» birleşigi Bitaraplyk gününe bagyşlap 3D multfilmi çykardy
Oguzhan adyndaky «Türkmenfilm» birleşigi Halkara Bitaraplyk gününe we Türkmenistanyň hemişelik bitaraplygynyň 27 ýyllygy mynasybetli çagalar üçin täze 3D multfilmini taýýarlady.
Animasiýa multfilmi Mämmetjanyň başdan geçirmeleriniň dowamy bolup, ol 4 ýaşdan uly bolan çagalara niýetlenendir. Bu gezek çagalara görelde bolan milli multfilmleriň gahrymany ýitirilen topy tapýar. Topyň eýesiniň gözleginde bolmak bilen, ol dürli ýagdaýlara düşmeli bolýar, onuň bu ýagdaýlarda baş alyp çykyşy bolsa ýaş nesle öwrenerli hem peýdaly bolup biler.
Multfilmi eýýäm Türkmenistanyň Telewideniýe, radiogepleşikler we kinematografiýa baradaky döwlet komitetiniň saýtynda (https://turkmentv.gov.tm/getShow/393) görüp bolýar. Milli telewideniýede bolsa ony şanly baýramyň öňüsyrasynda görkeziler.
Türkmenistanyň Telewideniýe, radiogepleşikler we kinematografiýa baradaky döwlet komitetiniň «Mahabat» müdirliginiň ýolbaşçysy Röwşen Welmiýew bu multfilme režissýorlyk etdi.
ORIENT news
Surat: döwlet Telewideniýe we radionyň «Mahabat» müdirligi
