Özbegistanda Hugo Boss brendi astynda egin-eşikleri öndürýän fabrik işe girizildi
Hugo Boss – bütindünýä meşhur brend we moda egin-eşiklerini öndüriji (Germaniýa) kompaniýasy “Fazman tekstil” özbek kärhanasy bilen bilelikde Namangan şäherinde häzirki zaman dokam fabrigini işe girizdiler. Bu ýerde kostýum-balak, şeýle hem Hugo Boss brendi astynda erkeklere, zenanlara we çagalara degişli egin-eşikleriň öndürilişini ýola goýmak meýilleşdirilýär diýip, Namangan häkimligine salgylanyp, özbek habarlar agentlikleri habar berýärler.
Dokma talamasy $40 million bahalandyrylýar. Häzirki wagtda 1500 iş orunlyk kärhananyň birinji nobatdakysy ulanylyşa tabşyryldy. Doly kuwwadyna işe girizilenden soň bu ýerde işgärleriň 3 müňden gowragy zähmet çekip biler.
Býujetiň bir bölegi -- $20 million Germaniýadan we Türkiýeden häzirki zaman enjamlaryny satyn almaga sarp edildi. Her ýyl özbek fabriginde taýýar önümiň bir million möçberiniň öndürilmegi meýilleşdirilýär, şunda eksportyň bir ýyllyk möçberi $15 million barabar bolar.
Maglumat üçin: Hugo Boss AG kompaniýasyny köplenç BOSS diýip atlandyrýarlar, ol lýuks derejeli Modalar öýi bolup durýar. Kompaniýa 1924-nji ýylda esaslandyryldy, bu gün bolsa ol egin-eşik öndürýän iň iri nemes kompaniýalarynyň birine öwrüldi. 2019-njy ýylda satuwyň möçberi 2,9 milliard ýewro deň boldy.
Hugo Boss kompaniýasyna bütin dünýä boýunça bölek satuw dükanlarynyň we butikleriň 1113-den gowragy degişlidir, şolardan egin-eşikleri, degişli serişdeleri, aýakgaplary we parfýumeriýany satyn alyp bolýar.
ORIENT news
