Niclaus Merkezi Aziýada we Ýakyn Gündogarda naýbaşy golf klubyny Awazada gurmaga taýyn
Duşenbe güni Aşgabatda Türkmen-amerikan işewürler forumynyň barşynda geçirilen duşuşykda Awazada üç sany golf meýdançasyny gurmak boýunça meýilnamalara garaldy.
Amerikanyň işewürler toparynyň düzüminde Niclaus kompaniýalar birleşmesine onuň baş direktory Jon Ris wekillik etdi. Ol 2-3 ýylyň içinde döredip boljak ajaýyp golf meýdançalarynyň Hazaryň kenarynda nähili ýerleşip biljekdigini fotosuratda görkezdi.
Onuň sözlerine görä, bu taslama Aziýanyň we Ýewropanyň golf söýüjilerini özüne çekjek we Awazany dünýä meşhur etjek Merkezi Aziýada we Ýakyn Gündogarda naýbaşy golf klubyna öwrülip biler. Taslamany tutuşlygyna 2025-nji ýylyň tomus möwsümine çenli tamamlap tabşyrmak mümkinçiligi bar.
Bu duşuşygyň netijeleri boýunça Jon Riz we Türkmenistanyň Senagatçylar we telekeçiler birleşmesiniň başlygy Döwran Hudaýberdiew tarapyndan Awazada golf klubyny döretmek boýunça özara düşünişmek hakynda memoranduma gol çekildi.
Nicklaus Companies golfçy Jek Niklausyň we onuň maşgalasynyň eýeçiligindäki golf bilen baglanyşykly kompaniýalaryň birleşmesidir. Ozal bu kompaniýa Niklausyň lakamy boýunça – “Golden Bear” (Altyn aýy) diýlip atlandyrylýardy. Ol golf boýunça Niklaus-Flick okuw we tejribe merkezlerini dolandyrýar, “Jek Niklaus” markaly golf üçin ýörite eşiklere we esbaplara ygtyýarnama berýär we golf meýdançasynyň gurluşygy boýunça firmalara geňeşmeleri geçirýär.
ORIENT news
