Gyrgyzystanyň Energetika ministrligi: Türkmenistanyň elektrik energiýasy respublikanyň ilaty üçin iň bähbitlisidir
Gyrgyzystanyň Energetika ministri Taalaýbek Ibraýew elektrik energiýasyny respublikanyň ýylylyk elektrik stansiýalarynda öndürmekden Türkmenistandan import etmegiň has bähbitlidigini nygtaýar. Bu barada Tazabek.kg agentligi goranmak, howpsuzlyk we migrasiýa boýunça geçirilen duşuşygyň jemleri boýunça habar berýär.
«Bu elektrik energiýasy ýylylyk elektrik stansiýasynda öndürilýän elektrik energiýasy bilen deňeşdirilende has elýeterli bolar. Elbetde, iň amatly bahadaky elektrik bu gidroelektrik stansiýalarynyň öndürýän energiýasydyr. Ýöne bu günki gün biziň şeýle mümkinçiligimiz ýok» — diýip, döwlet işgäri deputatlaryň biriniň — Türkmenistandan import edilýän elektrik togunyň ilat üçin gymmat boljakdygy baradaky soragyna jogap berdi.
Uglewodorod çig malyny elektrik energiýasyny öndürmek üçin ulanmakdan kem-kemden ýüz öwürmek hem-de goňşy ýurtlardan elektrik energiýanyň importyny artdyrmak bilen, Gyrgyzystanyň energetika pudagy ekologiýa taýdan has arassa we amatly energiýa çeşmelerine geçýär.
Şeýlelikde, Türkmenistan Gyrgyzystan Respublikasyna elektrik energiýasyny eksport etmekde iň esasy hyzmatdaş bolup durýar.
ORIENT news
Surat: Yandex
