Türkmenistanyň Ýaşlar guramasy Täze ýyl baýramçylygy mynasybetli makalalar we suratlar bäsleşigini geçirýär
Türkmenistanyň Magtymguly adyndaky Ýaşlar guramasy Täze ýyl baýramçylygy mynasybetli döredijilik bäsleşigini yglan etdi. Bäsleşigiň maksady ýaş nesli döredijilik işlerine çekmekden, zehinli ýazyjylary we suratçylary ýüze çykarmakdan we olary höweslendirmekden ybaratdyr. Bäsleşige mekdep okuwçylary bilen birlikde 35 ýaşa çenli ýaşlar hem gatnaşyp bilerler.
Ýaryşyň şertlerine laýyklykda gatnaşyjylar Türkmenistanda ýerleşýän täze söwda nokatlarynyň işini görkezýän ýörite materiallary taýýarlamaly we alyjylar, şeýle hem satyjylar bilen söhbetdeşlik geçirmeli. Bäsleşige hödürlenýän işler, türkmen işewürligi tarapyndan döredilen täze pudaklar, şeýle hem hyzmatlaryň täze görnüşleri barada hem bolup biler.
Telekeçileriň özleri hem söwda we önümçilik pudagyndaky işleri we gazananlary barada söhbet edip, döredijilik bäsleşigine gatnaşyp bilerler. Şol bir wagtyň özünde materiallarda berlen maglumatlaryň we sanlaryň ygtybarly we takyk bolmalydygyny ýatdan çykarmaly däldir.
Bäsleşige gatnaşmak üçin tabşyrylan surat işlerinde şäher we oba durmuşynyň özboluşly suratlary, söwda nokatlarynyň we hyzmat ediş nokatlarynyň işi (mysal üçin, gözellik salonlaryndaky hyzmatlar, dellekhanalar) bolmaly. Şeýle hem bulara dynç alyş, sport, okuw döwri we ş.m. baradaky suratlar hem degişlidir.
Taýýar edilen işler şu elektron poçta salgylarynda20-nji dekabra çenli kabul edilýär:
biznes.reklama@list.ru; biznes.reklama.newspaper@gmail.com; redaktor.geldiyev@gmail.com.
Şeýle hem gatnaşyjy ýaşaýan ýeri, iş ýa-da okaýan ýeri, eýeleýän wezipesi we aragatnaşyk belgisi barada maglumat bermelidir.
Bäsleşigiň netijeleri dekabr aýynda jemlener. Habarlaşmak üçin telefon belgisi: 23-77-95.
ORIENT news
Surat: zapbureya.ru
