Türkmenistan sanly gümrük hyzmatlaryny döwrebaplaşdyrýar
Türkmenistanda gümrük resminamalaryny elektron usulda resmileşdirmek we gaýtadan işlemek bilen baglanyşykly gümrük amallaryny we elektron hyzmatlaryny has-da ýokarlandyrmak boýunça okuw sapagy geçirildi. Bu barada Türkmenistanyň Döwlet gümrük gullugynyň resmi saýty habar berýär.
Okuw sapagyna gatnaşmaga Türkmenistanyň paýtagtyna Latwiýadan hünärmenler topary hem çagyryldy, daşary ýurtly kärdeşler Türkmenistanyň gümrük gullugynyň işleriniň sanly ulgam arkaly ýerine ýetirilişine ýokary baha berdiler. Duşuşyga gatnaşyjylar bilen birlikde Latwiýanyň hünärmenleri gümrük amallaryny ýönekeýleşdirmek, döwlet edaralary tarapyndan elektron rugsatnamalary we beýleki resminamalary resmileşdirmek boýunça iň oňat tejribeleri ara alyp maslahatlaşdylar.
«Eksport-import amallary üçin bir penjire» atly ulgamyň ähmiýeti barada nygtaldy. Onuň ulanylmagy, halkara söwda işleriniň amala aşyrylyşyny ýeňilleşdirmek üçin täsirli guraldyr we hususy ulgamyň wekillerine eksport, import we üstaşyr amallary ýerine ýetirilende çykdajylaryny azaltmaga mümkinçilik berýär.
Bu okuw sapagy Ýewropa Birleşiginiň howandarlygynda Merkezi Aziýada Serhet Dolandyryşyna Kömek Maksatnamasynyň (BOMCA 10) çäklerinde gurnaldy.
ORIENT news
Surat: customs.gov.tm
