Özbek hünärmeni Türkmenistanyň futbol tälimçileri üçin ygtyýarnama almak boýunça okuw sapagyny geçirýär
Aşgabatda Aziýa Futbol Konfederasiýasynyň (AFK) futbol tälimçileriniň «A» derejesi boýunça ygtyýarnama almak üçin okuw sapaklary geçirilýär. Bu barada Türkmenistanyň Futbol Federasiýasynyň web saýty habar berýär.
Ygtyýarnama almak okuwynyň maksatnamada bu ikinji okuw modulydyr. Onuň birinji bölümi noýabr aýynda gurnaldy. Okuwlary Özbegistandan gelen hünärmen, FIFA we AFK-nyň bilermeni Usmon Toşew alyp barýar we oňa AFK-nyň bilermeni, Türkmenistanyň at gazanan tälimçisi Röwşen Muhadow ýardam edýär. Umuman aýdanymyzda, 24 ýerli futbol tälimçisi nazaryýet bilimlerinden başga-da, amaly tejribelerini hem özleşdirýärler.
Özbek hünärmeni türkmen futbolynyň ösüşiniň geljegine oňyn baha berdi we munuň üçin ýurtda ähli şertleriň döredilendigini belledi.
Okuw sapagy 12-nji dekabra çenli dowam eder.
«A» derejeli ygtyýarnama futbolda we onuň görnüşlerinde tälimçi, ýurduň birinji diwizionyň toparlarynda baş tälimçi, şeýle hem AFK kubogynda topar tälimçisi bolup işlemek hukugyny berýär.
ORIENT news
Surat: Türkmenistanyň futbol federasiýasy tarapyndan berildi
