Türkmenistanyň halkara maglumat merkezi Olimpiýa şäherçesinde ýerleşer
Türkmenistanyň Telewideniýe, radiogepleşikler we kinematografiýa baradaky döwlet komitetiniň düzüminde Halkara habarlar merkezi dörediler. Bu barada anna güni geçirilen Türkmenistanyň Ministrler Kabinetiniň mejlisinde daşary işler ministri Raşid Meredow hasabat berdi – diýip, TDH agentligi ýazýar.
Täze merkeziň eýýäm işlemegi üçin zerur enjamlar bilen enjamlaşdyrylan paýtagtymyzyň Olimpiýa şäherçesindäki Halkara ýaýlyma beriş merkezinde ýerleşdirmegiň maksadalaýyk boljakdygy bellenildi.
Merkeziň esasy wezipeleri ýurdumyzda bolup geçýän möhüm wakalara bagyşlanan gepleşikleri, döwletiň alyp barýan syýasatyny we üstünliklerini ýaýýan, Türkmenistan bilen tanyşdyrýan gysga göwrümli dokumental filmleri we wideorolikleri taýýarlamakdan we daşary ýurtlaryň köpçülikleýin habar beriş serişdelerinde bermekden ybarat bolar. Şeýle hem ol Türkmenistana bagyşlanan ýörite neşirleri çap eder.
Türkmenistanyň Telewideniýe, radiogepleşikler we kinematografiýa baradaky döwlet komiteti halkara hyzmatdaşlygyny işjeň ösdürýär. Ozal bu edara «Мир» döwletara teleradiokompaniýasy bilen maglumat syýasaty pudagynda hyzmatdaşlyk etmek barada şertnama baglaşdy.
ORIENT news
Surat: olympic.tm
