Saud Arabystany zenanlaryň arasynda futbol boýunça Aziýanyň Kubogyny geçirmäge arza berdi
Saud Arabystany Aziýanyň futbol konfederasiýasyna (AFK) zenanlaryň arasynda 2026-njy ýylda Aziýanyň Kubogy ugrundaky ýaryşy geçirmäge resmi taýdan arza berdi.
Düzüminde zenanlaryň ýygyndy toparynyň baş tälimçisiniň kömekçisi Dona Rajab, oýunçy Ragada Helmi we ýaş futbolçy gyz Mariýa Baghaffar bolan Saud Arabystanynyň Futbol Federasiýasynyň (SAFF) wekiliýeti resminamalary bermek üçin AFC-niň Malaýziýanyň paýtagty Kuala-Lumpurda ýerleşen baş edarasyna ugrady.
Saud Arabystanynyň Futbol Federasiýasynyň Direktorlar Geňeşiniň prezidenti Ýasir Al Mişel patyşalygyň bu uly ajaýyp wakany özünde geçirmegi maksat edinýändigini tasyklady hem-de munuň ýurtda we sebitde zenan futboly üçin täze gözýetimleri açýandygyna ynam bildirdi.
Saud Arabystanynyň Futbol Federasiýasynyň resminamasy sebit we halkara sport çärelerine goşmaça hökmünde çempionatyň talaplaryny, şertlerini we ugurlaryny özünde jemleýär, şolary patyşalyk soňky birnäçe ýylda kabul etdi.
Ýaryşy geçirmäge hukuk almaga diňe Saud Arabystany dalaşgärlik etmeýär. Resminamalar şeýle hem Iordaniýa, Awstraliýa we Özbegistan tarapyndan berilmelidir. Şoňa görä-de, Aziýanyň Futbol Konfederasiýasynyň çözgüdi kabul edip, ýaryşyň eýesi boljak ýurdy öňümizdäki 2023-nji ýylda yglan etmegine garaşylýar.
ORIENT news
