Aşgabatda Bitaraplyk gününe bagyşlanan çagalar bäsleşigi geçirildi
Reňklere baý suratlar we kartinalar, kartondan, fanerden, agaçdan ýasalan dürli maketler, şeýle hem Türkmenistan hakynda gürrüň berýän düzmeler “Dünýä: çagalarymyzyň sesi” bäsleşiginde eminler toparyna hödürlendi. Bu ýerde 4-11-nji synplarda okaýan okuwçylaryň jemi 150-den gowrak eserleri görkezildi.
Çagalaryň arasyndaky döredijilik bäsleşigi ýurdumyzda 12-nji dekabrda bellenilýän Bitaraplyk gününe bagyşlanýar. Ýeňijiler üç kategoriýa boýunça kesgitlenildi: iň gowy düzme, iň gowy çyzgy we iň gowy maket. Gatnaşanlaryň her biri öz “eserleri” arkaly watana bolan söýgüsini beýan etdi. Olara şahadatnamalar we ýadygärlik sowgatlar gowşuryldy.
Şeýle ýaryşlar zehinli ýaşlary ýüze çykarýar. Ýeňijileriň eserleri "Güneş" çagalar žurnalynda çap ediler.
Bäsleşik Türkmenistanyň Parahatçylyk gaznasy, Magtymguly adyndaky Ýaşlar guramasynyň merkezi geňeşi, Türkmenistanyň Bilim ministrligi we “Güneş” žurnalynyň redaktorlary tarapyndan gurnaldy.
ORIENT news
