Türkmen hünärmenleri COVID-19 bilen kesellänlere kliniki ideg etmek boýunça okuw geçdiler
Bütindünýä Saglygy goraýyş guramasynyň Türkmenistandaky edarasy BSGG-nyň Ýewropa bölümi we Türkmenistanyň Saglygy goraýyş we derman senagaty ministrligi bilen bilelikde COVID-19 bilen kesellänlere giňeldilen ideg boýunça okuw sapagyny geçirdi. Bu barada BSGG-nyň resmi saýtynyň maglumatynda habar berilýär.
BSGG-nyň COVID-19 boýunça esasy kliniki görkezmeleriniň esasynda geçirilen bu okuw sapagy ýurduň lukmançylyk ulgamynda zähmet çekýän hünärmenlere COVID-19 bilen kesellän hassalaryna öz wagtynda we ýokary hilli ideg bermek üçin zerur bilimleri we tejribeleri almaga mümkinçilik berdi.
Bütindünýä saglygy goraýyş guramasynyň hünärmenleri näsaglara ideg edilende ýokanç keselleriň öňüni almak we gözegçilikde saklamak tejribesi, ilkinji barlagynyň aýratynlyklary we COVID-19-da mikroblara garşy serişdeleriň ulanylyşy barada gürrüň berdiler.
Gyssagly lukmançylyk kömegini talap edýän hassalar üçin ýokary hilli ideg etmek toparlaýyn işlemek iň ygtybarly usuldyr, şeýle hem bu degişli karara gelmekde örän täsirli we netijelidir. Şeýlelikde, okuw sapagyna gatnaşyjylar COVID-19 bilen hassahana ýerleşdirilen näsaglara ideg etmek üçin toparlaýyn çemeleşmäni öwrendiler.
Geljekde bu okuw sapaklaryna gatnaşanlar bu ugurda ýokary derejeleri milli bilermenleri taýýarlamak üçin ýerli lukmanlar bilen özleriniň bilimlerini paýlaşarlar.
ORIENT news
Surat Bütindünýä saglygy goraýyş guramasynyň Türkmenistandaky edarasy tarapyndan berlen
