Rus demirýollarynyň hünärmenlerinden ybarat wekiliýet türkmen kärdeşleri bilen hyzmatdaşlygyň täze taslamalaryny maslahatlaşar
Türkmenistan we Russiýa demir ýol düzümlerini ösdürmegiň üstünde işleýärler, rus kompaniýalarynyň bolsa türkmen demir ýol pudagyny döwrebaplaşdyrmaga gatnaşmagy üçin uly mümkinçiligi bar diýip, anna güni RF-niň Türkmenistandaky söwda wekili Aleksandr Ýelizarow TASS-yň habarçysy bilen bolan söhbetdeşliginde aýtdy.
Ol şeýle hem ýakyn wagtda ýurda rus demirýollarynyň hünärmenlerinden ybarat wekiliýietiň barjakdygyny, türkmen demir ýollarynyň durkuny täzelemek boýunça geçirilmeli zerur işlere baha berjekdiklerini hem-de ägirt uly üstaşyr kuwwata eýe bolan Türkmenistanyň demirýol hojalygynyň geçirijilik ukybynyň mümkinçiligini öwrenjekdiklerini habar berdi.
Ýük daşalyşynyň artmagy bilen, bar bolan ýollary döwrebaplaşdyrmak hem-de täze ýol hojalyklaryny gurmak, döwrebap ammar düzümlerini, şol sanda üsti ýapyk we sowadyjy desgalary bina etmek zerur bolar. Uzak möhletleýin beýleki taslamalaryň hatarynda türkmen demir ýollaryny elektrikleşdirmek we uglewodorod ýangyjyny peýdalanmakdan daşlaşmak taslamalary bar diýip, rus söwda wekili belledi.
Ileri tutulýan ugurlaryň ýene-de biri tehnikalary ibermek babatda hyzmatdaşlykdyr. Ýakynda Türkmenistana Russiýanyň “Transmaşholding” PJ-niň teplowozlarynyň bäşisi getirildi. Ýelizarowyň sözlerine görä, Söwda wekilhanasy rus kompaniýasy bilen bilelikde nobatdaky şertnamanyň üstünde işleýär.
ORIENT news
