Kazanda yslamyň ölçegleri we şerigatyň kadalary boýunça RF-de ilkinji bank açyldy
Russiýada yslam bank ölçegleri boýunça Sberbankyň ilkinji edarasy 1-nji dekabrda Tatarystanyň Kazan şäherinde açyldy. Bu ýerde respublikanyň musulmanlary şerigatyň kadalaryna hem-de RF-niň kanunçylygynyň talaplaryna laýyk gelýän bank hyzmatlaryny alyp bilerler diýip, RT habarlar agentligi habar berýär.
Täze edara aýry-aýry hem-de bilelikdäki müşderilere hyzmat eder. Olar hyzmatdaşlyk taýdan maliýeleşdirmegiň dürli gurallaryny: halal maýa goýum gurallaryny, mudarabadan (bu aktiwleriň ynandyryjylykly dolandyrylmagy), ijaradan (lizing diýmegi aňladýar) peýdalanyp bilerler. Yslamyň maliýe adalgalary köpler üçin nätanyş bolup biler, ýöne olar bank hyzmatlarynyň mazmunyny üýtgetmeýär. Bu ýere gelýänler, şeýle hem, söwda maliýeleşdirmesini, bank kepilliklerini, töleg we gündeki hasaplary hem-de hyzmatyň beýleki görnüşlerini peýdalanyp bilerler.
Zalyň içinde “Russiýada Yslam muzeýi” diýen diwarlyk bar, bu ýerde myhmanlar Kazan şäheriniň taryhy bilen tanşyp biler hem-de ýöriteleşdirilen dükandan sowgatlyk şaý pullaryny we Sberiň nyşany şekillendirilen beýleki önümleri satyn alyp bilerler.
Bölümiň ugurdaş hyzmatlarynyň hatarynda kofeleriň we çaýlaryň 20-den gowrak görnüşlerini hem-de mukaddes “Zem-Zem” çeşmesiniň suwy hödürlenilýän ýer bar.
Tatarystan Respublikasynyň baştutany Rustam Minnihanowyň belleýşi ýaly, täze edara respublikanyň musulmanlaryna Russiýanyň kanunçylygynyň talaplaryna hem-de şerigatyň kanunlaryna laýyk gelýän bank hyzmatlaryndan peýdalanyp bilerler. Yslam maliýeleşdiriş ulgamy söwda-ykdysady hyzmatdaşlygyň geljegi uly ugry bolup, şeýle nusga maýalaryň we söwda meýdançalarynyň günbatar bazarlaryna bäsdeş hökmünde çykyş edip biler diýip, TR-niň prezidenti aýtdy.
ORIENT news
