Türkmenistanyň we BAE-niň nebite degişli bolmadyk söwdasynda ozalkylardakydan uly ösüş bellige alyndy we diplomatik kabul edişlikden fotosurat
Ýedi emirligiň jebisliginiň hormatyna baýram edilýän BAE-niň Milli gününiň 51 ýyllygy mynasybetli bu ýurduň Aşgabatdaky ilçihanasy dabaraly kabul edişlik gurady.
Prezident Serdar Berdimuhamedowyň hem-de Türkmenistanyň hökümetiniň adyndan anna güni agşam gutlag sözi bilen wise-premýer Batyr Atdaýew çykyş etdi.
Ol BAE-niň durmuş-ykdysady ulgamda, döwlet gurluşyny pugtalandyrmakda, halkyň hal-ýagdaýyny ýokarlandyrmakda gazanan uly üstünlikleri üçin dünýäde giňden ykrar edilýändigini belledi.
Türkmenistan bilen Birleşen Arap Emirlikleriniň arasyndaky dost-doganlyk gatnaşyklary özara düşünişmegiň we ýygjam hyzmatdaşlygyň ýokary derejesi bilen tapawutlanýar. Munuň şeýledigine iki ýurduň arasyndaky haryt dolanyşygynyň ösüşi hem-de emirlikleriň maýadarlarynyň Türkmenistanda durmuşa geçirilýän birnäçe iri taslamalara gatnaşmagy şaýatlyk edýär.
Şunuň bilen baglylykda, Türkmenistanyň Prezidenti Serdar Berdimuhamedowyň ýakynda (21-22-nji noýabr) bolan resmi sapary hem-de onuň çäklerinde geçirilen duşuşyklary we gepleşikler bellenilip geçildi, şolar ikitaraplaýyn gatnaşyklaryň täze tapgyrynyň esasyny goýdy.
Häzirki wagtda Birleşen Arap Emirlikleri Türkmenistanyň iri söwda hyzmatdaşydyr, şu ýylyň dokuz aýynda nebite degişli bolmadyk ikitaraplaýyn söwdanyň möçberi ABŞ-nyň 653 million dollaryna ýetdi. Bu bolsa geçen ýylyň görkezijisi bilen deňeşdirilende, ozalkylardan has ýokary 296% ýeten ösüş bolup durýar. Bu barada BAE-niň ilçisi Ahmed Al-Haý Al-Hameli aýtdy.
ORIENT news
