Hytaý gartaşan adamlara COVID-19-a garşy sanjym etmek boýunça hereket etmegiň meýilnamasyny kabul edýär
Hytaý gartaşan adamlara COVID-19 garşy sanjymyň edilişini çaltlaşdyrmak boýunça hereket etmegiň meýilnamasyny yglan etdi. Bu barada China daily agentligi habar berýär.
Bu resminama Döwlet geňeşiniň Bilelelikde öňüni alyş we gözegçilik mehanizminiň çäklerinde taýýarlandy we şoňa laýyklykda garrylara, esasan hem, 80 we ondan ýokary ýaşly adamlara köpçülikleýin barlaglary geçirmek göz öňünde tutulýar. Şunuň bilen baglylykda, immunizasiýa etmegiň ähmiýeti barada jemgyýetçiligiň habardarlygyny ýokarlandyrmak üçin çäreler alnyp barylýar.
Garry adamlar üçin sanjym işleri garrylara ideg ediş öýlerinde, dynç alyş merkezlerinde, köp sanly gartaşan adamlaryň gatnaşýan ýygnanyşyklarda we syýahatçylyk toparlarynda çaltlaşdyrylar.
Maglumatlara görä, ýurtda 1,27 milliarddan gowrak adama doly sanjym edildi we takmynan 811 million adam gaýtadan sanjym aldy. Şeýle-de bolsa, garrylaryň sanjym derejesi pes bolmagynda galýar. 60 we ondan ýokary ýaşly adamlaryň arasynda ilatyň jemi 86,4%-i ilkinji sanjymy alypdyr, 80 we ondan ýokary ýaşlylaryň arasynda bu görkeziji 65,8%-e deň boldy.
Sanjymy çaltlaşdyrmak üçin ilkinji sanjym bilen gaýtadan sanjymyň arasyndaky möhletiň alty aýdan üç aýa çenli azalandygyny bellemelidiris.
Bu meýilnama immunizasiýa hyzmatlarynyň hilini ýokarlandyrmagy, şol sanda ykjam sanjym enjamlarynyň ulanylmagynyň goldanylmagyny hem öz içine alýar.
ORIENT news
Surat: China Daily
