Italiýa Aşgabada täze ilçi belledi
Italiýanyň Aşgabatdaky ilçihanasyna diplomatik wekiliýetiniň ýolbaşçysy Luçano Galliniň ýerine kärdeşi Luidži Ferrari bellendi. Bu barada “OnuItalia” Rimiň 2014-nji ýylda türkmen paýtagtynda diplomatik ofisini açandygyny bellemek bilen, habar berýär.
Neşir geljegi uly gaz üpjünçiliginiň Italiýa bilen Türkmenistanyň arasynda işjeň hyzmatdaşlyk ugurlarynyň birine öwrülip biljekdigini öňe sürýär. Şol bir wagtyň özünde, esasy halkara guramalarynda özara goldawa eýe bolýan Türkmenistanyň bitarap pozisiýasyna Italiýanyň ýokary baha berýändigi nygtalýar.
“OnuItalia” Ferrariniň: "Men Türkmenistandaky işime uly höweş we egsilmez hyjuw bilen başlaýaryn, bu ýerde men dostlugy we ikitaraplaýyn gepleşikleri mundan beýläk-de ösdürmek ugrunda işlärin" – diýen sözlerini getirýär.
Ferrariniň Rim uniwersitetiniň syýasat fakultetini tamamlap, diplomatik işine 1993-nji ýylda Italiýanyň Daşary işler ministrliginiň işgärler müdirliginde başlandygy habar berilýär. 1996-njy ýylda ol ýurt daşyndaky ilkinji işine Stokgolmda başlaýar, 1999-njy ýyldan 2003-nji ýyla çenli bolsa Angolada işleýär.
Farnesina gaýdyp gelensoň (italiýalylar öz DIM-ni şeýle atlandyrýarlar), ol tä 2018-nji ýylda Kopengagene ilçi bellenýänçä, içerki gulluklarda işleýär. 2022-nji ýylyň sentýabr aýyndan bäri şu wagta çenli Ferrari ýene-de Italiýanyň Daşary işler ministrliginiň Syýasy meseleler boýunça baş müdirliginde işledi.
ORIENT news
