Türkmenistan we Azerbaýjan söwda we energiýa pudagynda hyzmatdaşlygy giňeltmek meselesini ara alyp maslahatlaşdylar
Iki döwletiň wekilleri Bakuda ykdysady we ynsanperwer pudaklarynda hyzmatdaşlyk etmek boýunça Bilelikdäki Türkmen-azerbaýjan hökümetara toparynyň mejlisinde hyzmatdaşlygyň meselelerini, şeýle hem söwda we ykdysady gatnaşyklary giňeltmegiň mümkinçiliklerini ara alyp maslahatlaşdylar.
Bu barada Azerbaýjanyň ykdysadyýet ministri Mikaýil Jabbarow gepleşikleriň netijeleri barada öz Twitter hasabynda habar berýär.
«Bilelikdäki tagallalaryň söwda, energiýa, ulag, oba hojalygy we beýleki ugurlardaky hyzmatdaşlygymyzy berkitmäge kömek etjekdigine ynanýarys» -diýip, Jabbarow belleýär.
Duşuşykdan öň Türkmenistanyň wekiliýeti Azerbaýjanyň prezidenti Ilham Alyýew tarapyndan kabul edilipdi Duşuşykda taraplar energiýa, ulag we logistika pudaklarynda ýurtlaryň arasyndaky hyzmatdaşlygy ösdürmek meselelerini ara alyp maslahatlaşdylar. Duşuşykda söwda dolanyşygynyň ýokarlanmagy we ýurtlaryň arasyndaky söwda hyzmatdaşlygyny has-da giňeltjek täze bilelikdäki taslamalary durmuşa geçirmegiň ähmiýeti barada nygtaldy.
ORIENT news
Surat: twitter.com / @MikayilJabbarov
