Türkmenistanda daşary ýurt dillerini bilmek boýunça döwlet bäsleşigi geçirilýär
Türkmenistanyň Bilim ministrligi eýeçilik görnüşine garamazdan gysga möhletli okuw sapaklaryny berýän ýurduň bilim merkezleriniň okuwçylarynyň arasynda daşary ýurt dillerini biliş derejesi boýunça bäsleşik geçirýär.
Bäsleşigi geçirmegiň tertibi Bilim ministri Gurbangül Ataýewanyň buýrugy bilen tassyklanyp, sişenbe güni Türkmenistanyň Adalat ministrliginiň hukuk maglumatlary portalynda çap edildi.
Bäsleşik daşary ýurt dillerini bilmegi kämilleşdirmäge, okuwçylaryň arasynda iň zehinlilerini ýüze çykarmaga, şeýle hem Türkmenistanda daşary ýurt dillerini okatmagyň derejesini ýokarlandyrmaga niýetlenendir.
Bäsleşigi geçirmegiň tertibine laýyklykda 12-den 13 ýaşa çenli, 14-den 15 ýaşa çenli, şeýle hem 16 we ondan uly ýaşly üç ýaş derejesindäki okuwçylar bäsleşige gatnaşyp bilerler.
Okuw merkeziniň okuwçylarynyň arasynda bilim derejesi boýunça tapawutlanan gatnaşyjylar sebit derejesinde «göreşi» dowam etdirerler. Has tapawutlananlar ýaryşyň milli tapgyrynda daşary ýurt dilini biliş derejesi boýunça synagdan geçip, Türkmenistanyň dürli künjeklerinden bolan garşydaşlary bilen duşuşarlar.
Ýeňijiler aýratynlykda we topar derejesinde kesgitlenerler.
ORIENT news
Surat: waldorfschule.ru
