Prezident Serdar Berdimuhamedow TÜRKSOÝ-nyň Baş sekretaryny kabul etdi
Döredijilik we ylmy alyş-çalyşlar, umumy mirasy öwrenmek we dünýä ýaýmak ugrundaky özara gatnaşyklar Türkmenistanyň Prezidenti Serdar Berdimuhamedow bilen Türki medeniýetiniň halkara guramasynyň Baş sekretary Soltan Raýewiň arasyndaky söhbetdeşligiň esasy mowzugy boldy.
Duşenbe güni geçirilen duşuşykda döwlet baştutany 2024-nji ýylyň “Türki dünýäniň beýik şahyry we akyldary Magtymguly Pyragy ýyly” we şol ýylda Änew şäheriniň “Türki dünýäniň medeni paýtagty” diýlip yglan edilmegi mynasybetli TÜRKSOÝ-nyň ýolbaşçylaryna minnetdarlyk bildirdi.
Serdar Berdimuhamedow bilen Soltan Raýew 2023-nji ýylda bellenjek TÜRKSOÝ-nyň 30 ýyllygy we 2024-nji ýylda Magtymgulynyň 300 ýyllygy mynasybetli geçiriljek çäreler barada durup geçdiler.
Prezident Türkmenistanyň halkara gatnaşyklaryny ösdürmekde medeni diplomatiýanyň ähmiýetini belläp, TÜRKSOÝ bilen hyzmatdaşlygy işjeňleşdirmek we medeni gepleşikleri giňeltmek meselesiniň zerurdygyny aýtdy.
ORIENT news
