Türkmenistan Owganystanda guran Saglyk öýünde düýpli abatlaýyş işlerini geçirdi
Owganystanyň Faryab welaýatynyň Garamgol etrabynda Türkmenistanyň hökümeti tarapyndan 2009-njy ýylda gurlan Saglyk öýüniň durkunyň düýpli abatlanyp berilmegi bilen bagly dabaraly resmi çäre geçirildi. Ýurtda soňky döwürde bolup geçen wakalar sebäpli, saglygy goraýyş edarasyna zyýan ýetdi we şol sebäpli, türkmen hökümeti tarapyndan onuň doly abatlanmagyna we enjamlaşdyrylmagyna serişde bölünip berildi, şeýle hem, ynsanperwer kömegi hökmünde owgan tarapyna medisina enjamlary, derman serişdeleri gowşuryldy.
Ynsanperwer kömeginiň berilmegi we Saglyk öýüniň durkunyň täzelenmegi mynasybetli geçirilen dabaraly çärä Türkmenistanyň Mazar-i-Şerifdäki Baş konsullygynyň wekilleri, Farýab welaýatynyň Garamgol, Gorgan, Andhoý we Hançarbag etraplarynyň häkimleri, saglygy goraýyş edaralarynyň ýolbaşçylary, ýerli ýaşaýjylar, şol sanda ýaşulular gatnaşdylar.
Mundan başga-da, dabaraly çäräniň dowamynda Garamgol etrap bilim bölümine etrabyň mekdeplerinde türkmen dili sapaklarynda gollanma hökmünde peýdalanmak üçin 1-4-nji synplara niýetlenen okuw kitaplary gowşuryldy. Soňra Saglyk öýünde dabara gelen myhmanlaryň gatnaşmagynda sadaka berildi.
Halk köpçüligine giňden ýaýratmak maksady bilen bu çärä Owganystanyň “Milli” teleýaýlymynyň, Owganystandaky türkmen diasporasynyň “Tolkun News” kanalynyň we beýleki KHBS-niň wekilleri işjeň gatnaşdylar.
ORIENT news
Suratlar Türkmenistanyň DIM tarapyndan berildi
