Türkmen işewürleri «Ready4trade» okuw maslahatynda halkara söwdanyň aýratynlyklaryny öwrendiler
Halkara söwda merkezi tarapyndan durmuşa geçirilýän «Ready4trade» taslamasy Türkmenistanyň telekeçileri üçin eksporty dolandyrmak we serhetüsti amallaryny berjaý etmek boýunça okuw geçirdi. Taslama Ýewropa Birleşigi tarapyndan maliýeleşdirilýär.
Ýurdumyzyň önümlerini eksport etmegi maksat edinýän kiçi we orta telekeçiligiň wekilleri bäş günüň dowamynda halkara söwdanyň düzgünleri, Ýewropa Birleşiginiň bazar talaplarynyň aýratynlyklary, şeýle hem awtoulag üstaşyr ugurlary bilen tanyşdylar.
Häzirki wagtda uly bolmadyk kärhanalaryň bazar şertlerine has uýgunlaşýandygy we çeýe dolandyryş ulgamyna eýedigi sebäpli, kiçi we orta telekeçiligiň eksport kuwwatyny ýokarlandyrmak iň möhüm mesele bolup durýar.
Okuw Halkara söwda merkeziniň we Türkmenistanyň Ykdysadyýetçiler birleşiginiň ygtyýarnamaly tälimçiler Jemal Kakyşewa bilen Arslan Orazgeldiýew tarapyndan geçirildi.
ORIENT news
Surat: Ready4trade
