Türkmenistanda «Ýerli öz-özüňi dolandyryş hakynda» Kanun kabul edildi
Şu gün resmi metbugatda çap edilen we güýje giren Türkmenistanyň «Ýerli öz-özüňi dolandyryş hakynda» täze kanuny, ýerli öz-özüňi dolandyryş edaralarynyň – Geňeşleriň, şeýle hem çäk jemgyýetçilik öz-özüňi dolandyryş edaralarynyň – Mejlisleriň ygtyýarlyklaryny düzgünleşdirýär.
Kanuna laýyklykda Geňeş şulary özbaşdak edip biler:
- öz çäginiň ykdysady, durmuş we medeni taýdan ösdürmegiň ugurlaryny kesgitlemek,
- ýerli salgytlary, ýygymlary hem-de olary almagyň tertibini bellemek,
- öz býujet serişdeleriniň hasabyna önümçilik, söwda, hyzmat ediş kärhanalaryny gurmak,
- durmuş meselelerini çözmek we çäkleri abadanlaşdyrmak üçin meýletinlik esaslarynda serişde ýygnamak,
- ýollaryň, köprüleriň we jemagat maksatly desgalaryň we ş.m. gurluşygyny we abatlaýyş işlerini guramak we hiline gözegçilik etmek.
Mejlisler gyzyklanýan raýatlaryň başlangyjy boýunça döredilip, öz çäginde kanunyň berjaý edilişine, jemagat hyzmatlarynyň berilmegine, binalary gurmagyň we öz çägini saklamagyň kadalaryna gözegçilik edip biler.
Täze kanun raýatlara, milletine, teniniň reňkine, jynsyna, gelip çykyşyna, emläk hem wezipe ýagdaýyna, ýaşaýan ýerine, diline, dine garaýşyna, syýasy ynam-ygtykadyna ýa-da gaýry ýagdaýlaryna garamazdan ýerli we jemagat öz-özüňi dolandyryş edaralaryna saýlanmak mümkinçiligini kepillendirýär.
Degişli çäkde hemişelik ýa-da köplenç ýaşaýan daşary ýurt raýatlary we raýatlygy bolmadyk adamlar ýerli öz-özüňi dolandyryşa gatnaşyp bilerler.
ORIENT news
Surat: redaksiýanyň arhiwinden
