Türkmenistanyň Ýaşlar Guramasy Halkara Bitaraplyk güni mynasybetli bäsleşik geçirýär
Türkmenistanyň Magtymguly adyndaky Ýaşlar guramasynyň Merkezi Geňeşi Türkmenistanyň Bedenterbiýe we sport baradaky döwlet komitetiniň «Türkmenistan sport» halkara žurnaly bilen bilelikde «Bitaraplyk –bagtym meniň» atly döredijilik bäsleşigini yglan etdi.
Bäsleşik Halkara bitaraplyk gününe we Türkmenistanyň hemişelik bitaraplygynyň 27 ýyllygyna bagyşlanýar. Bäsleşigiň maksady ýurdumyzyň dürli ugurlarda ýeten sepgitlerini äşgär etmekden, şeýle hem bitaraplyk syýasatynyň ýörelgeleri bilen sport syýasatynyň arasyndaky arabaglanyşygy görkezmekden ybaratdyr.
Bäsleşige žurnalistler, fotožurnalistler, suratkeşler, mugallymlar, talyplar, şeýle hem döredijilik işleri bilen gyzyklanýan mekdep okuwçylary gatnaşyp bilerler.
Bäsleşige gatnaşmak üçin žurnalistikanyň žanrlarynyň biri boýunça (makala, düzme, söhbetdeşlik, oçerk we ş.m.) we çeper eserlerden (hekaýa, nowella we ş.m.) materiallary, şeýle hem hemişelik bitaraplyk derejesiniň ýörelgeleriniň düýp manysyny açyp görkezýän fotoetýudlary taýýarlamaly. Taýýarlanylan işler 11-nji dekabrdan öň turkmenistansport@sanly.tm, turkmen-youth@online.tm e-poçta salgylaryna iberilmelidir.
Eserleriň we suratlaryň bir bölegi Türkmenistanyň Bedenterbiýe we sport baradaky döwlet komitetiniň, Türkmenistanyň Magtymguly adyndaky Ýaşlar Guramasynyň Merkezi geňeşiniň resmi web saýtlarynda ýerleşdiriler. Tapawutlanan eserler bolsa "Türkmenistan sport" atly halkara žurnalynda we hepdelik çap edilýän "7/24.tm" elektron goşundysynda çap ediler.
ORIENT news
Surat: yashlar.gov.tm
