«Awaza» milli syýahatçylyk zolagy 2023-nji ýylda halkara syýahatçylygyň ösdürilmegine bagyşlanan maslahaty geçirmäge taýýardyr
Türkmenistanyň hökümeti Bütindünýä Syýahatçylyk Guramasynyň (UNWTO) wekillerini we hünärmenlerini Türkmenistana çagyrmagy we 2023-nji ýylyň ikinji çärýeginde «Awaza» milli syýahatçylyk zolagynda halkara syýahatçylygyň ösdürilmegine bagyşlanan maslahaty geçirmegi meýilleşdirýär.
Bu teklip, wise-premýer, Türkmenistanyň Daşary işler ministri Raşid Meredow tarapyndan Türkmenistanyň Milli Geňeşiniň ýokarky palatasynyň Başlygy Gurbanguly Berdimuhamedowyň ýolbaşçylygynda Awazada geçirilen iş maslahatynda öňe sürüldi. Bu barada TDH agentligi habar berýär.
Maslahat, daşary ýurtly hyzmatdaşlar bilen gatnaşyklary pugtalandyrmak we bilelikde ýörite tejribe alyşmak boýunça gatnaşyklary giňeltmek maksady bilen guralar.
Daşary işler ministri halkara guramalar we daşary ýurtly hyzmatdaşlar bilen geçirilýän geňeşmeleriň möhümdigine ünsi çekip, ýurtda ekologik, tebigy we lukmançylyk syýahatçylygyny ýokarlandyrmagyň we yzygiderli ösdürmegiň möhümdigini belledi.
ORIENT news
Surat: redaksiýanyň arhiwinden
