Azerbaýjan we Gruziýa Hazar sebitinde suwuklandyrylan tebigy gaz terminalyny gurmak baradaky taslama täzeden girişýärler
Azerbaýjan we Gruziýa Ýewropa Birleşiginiň ýurtlaryna eksporty artdyrmak maksady bilen, suwuklandyrylan tebigy gazyň terminalyny gurmak baradaky taslama täzeden girişýärler. Bu barada ТАСС agentligi habar berýär.
2015-nji ýylda doly tamamlanmadyk bu taslama, Hazar deňzi sebitinden tebigy gazy çykarmak we ony soňra Gruziýanyň çäginde suwuklandyryp, Ýewropa sebitine degişli bolan döwletlere — Wengriýa, Rumyniýa, şeýle hem Günbatar Ýewropa döwletlerine eksport etmek niýetlenendir.
«Gynansak-da, bu taslama togtadylypdy ... Muňa garamazdan, häzirki wakalara esaslanyp, Ýewropanyň gaz üpjünçiligi boýunça alternatiw çeşmeleri bilen gyzyklanýan döwründe, ähli ýurtlar energiýa göterijilerini ibermegi diwersifikasiýa etmek barada pikir alyşýarlar, bu bolsa bu taslamanyň şu ýyl üçin örän möhümdigini äşgär edýär» – diýip, Gruziýanyň Ykdysadyýet we durnukly ösüş ministri Lewan Dawitaşwili belläp geçýär.
Azerbaýjanyň prezidenti Ylham Alyýew bilen Gruziýanyň prezidenti Salome Zurabişwiliniň arasyndaky gepleşikleriň esasy özeni bu taslamanyň durmuşa geçirilmegi bilen baglanşykly bolandygy ozal mälim edilipdi.
Bu taslama Gruziýanyň Nebit we gaz korporasiýasy, Azerbaýjanyň «SOCAR» Döwlet nebit kompaniýasy, şeýle hem rumyn we wenger hyzmatdaşlary gatnaşarlar. Şol bir wagtyň özünde, mundan ozal Azerbaýjan we Rumyniýa hem Gara deňizdäki hyzmatdaşlygy güýçlendirmek maksady bilen, suwuklandyrylan gaz terminallarynyň toplumyny gurmak barada ylalaşypdylar.
Gara deňziň we Hazar deňziniň üsti bilen energiýa üpjünçiliginiň güýçlendirilmegi Ýewropanyň energiýa bazarynyň diwersifikasiýasyna uly goşant goşar we degişli ýurtlaryň ykdysadyýetiniň ösmegine täze itergi berer.
ORIENT news
Surat: www.autoparus.by
