BMG-niň Neşe serişdeleri we jenaýatçylyk baradaky müdirliginiň Merkezi Aziýa boýunça sebitleýin bölüminiň wekili Türkmenistanyň gümrük nokatlaryna baryp görmegi meýilleşdirýär
BMG-niň Neşe serişdeleri we jenaýatçylyk baradaky müdirliginiň Merkezi Aziýa boýunça sebit bölüminiň wekili Aşita Mittal Türkmenistana bolan resmi saparynyň çäklerinde Aşgabatdaky halkara gümrük terminalynyň Port Dolandyryş bölümine we Lebap welaýatyndaky Ymamnazar barlag-goýberiş nokadyndaky serhet hyzmatdaşlygy bölümine baryp görmegi meýilleşdirýär. Bu barada Türkmenistanyň Döwlet gümrük gullugynyň resmi saýty habar berýär.
Ozal Aşita Mittal Türkmenistanyň Döwlet gümrük gullugynyň başlygy Maksat Hudaýgulyýew bilen duşuşypdy. Taraplar iki düzümiň arasyndaky hyzmatdaşlygy ösdürmekde oňyn ugurlaryň bardygyny bellediler.
Birleşen Milletler Guramasynyň Neşe serişdeleri we jenaýatçylyk baradaky müdirliginiň (UNODC) Merkezi Aziýadaky sebit bölümi ýurduň Döwlet gümrük gullugynyň esasy halkara hyzmatdaşlarynyň biridir. Şunuň bilen baglylykda, Bütindünýä gümrük guramasy bilen bilelikde söwda konteýnerleriniň hereketine gözegçilik etmek üçin maksatnama durmuşa geçirilýär. Bu maksatnamanyň çäklerinde döredilip, Aşgabatdaky halkara gümrük terminaly we Türkmenbaşy şäheriniň deňiz porty, Lebap welaýatynyň gümrük gullugynyň «Farap Awtoýollary» gümrük nokatlarynyň binýadyndaky Port dolandyryş toparlary ContainerCOMM ulgamy arkaly maglumatlary geçirmek boýunça 10 ýurt bilen ýakyn özara aragatnaşyk saklaýarlar.
ORIENT news
Surat: customs.gov.tm
