Aşgabatda BMG-niň neşe serişdeleri we jenaýatçylyk baradaky Müdirliginiň sebitleýin forumy geçirilýär
Aşgabatda Ýakyn we Orta Gündogar ýurtlarynda neşe serişdeleriniň bikanun dolanyşygy hem-de oňa degişli meseleler boýunça kömekçi komissiýasynyň nobatdaky 55-nji mejlisi öz işine başlady. 25-nji noýabra çenli dowam etjek bu çäre Türkmenistanyň hökümeti Birleşen Milletler Guramasynyň neşe serişdeleri we jenaýatçylyk baradaky Müdirligi (UNODC) bilen bilelikde guraýarlar. Bu barada ORIENT-iň habarçysy habar berýär.
Duşuşyga 11 ýurtdan – Türkiýeden, Hindistandan, Gazagystandan, Gyrgyzystandan, Şweýsariýadan, Awstriýadan, Iordaniýadan, Bahreýnden, BAE-den, Fransiýadan, şeýle hem halkara guramalardan wekiller gatnaşýarlar.
Birnäçe günüň dowamynda gatnaşyjylar bikanun neşe dolanyşygyna garşy göreşde sebit we sebitara hyzmatdaşlygy ara alyp maslahatlaşarlar, şeýle hem olary gizlemek usullarynyň täzeçilliklerine serederler.
Tematiki mejlisleriň çäklerinde sintetiki neşe serişdeleriniň öndürilişini we olaryň bikanun dolanyşygyny, şol sanda olaryň howpsuz ýagdaýda öňüni almak we neşe bilen baglanyşykly jenaýatlar üçin ýörite bellenilmeli temmiler ýaly meseleler boýunça çekişmeler geçirilýär.
Türkmenistan neşe serişdeleriniň bikanun dolanyşygyna garşy göreşi özüniň içerki syýasatynda ileri tutulýan meseleleriniň biri hökmünde kesgitledi. Maslahatda çykyş eden BMG-niň Türkmenistandaky utgaşdyryjysy Dmitriý Şlapaçenko ýurduň bu ugurdaky tagallalaryna ýokary baha berdi.
Şunuň bilen baglylykda, 2022-2025-nji ýyllar üçin Türkmenistan bilen UNODC-nyň arasyndaky hyzmatdaşlygyň Ýol kartasy kabul edildi. Bu bolsa BMG-niň neşe serişdeleri we jenaýatçylyk baradaky Müdirliginiň (UNODC) 2022-2025-nji ýyllar üçin Merkezi Aziýa boýunça maksatnamasynyň netijeli durmuşa geçirilmegine goşant goşar. Türkmenistanyň syýasatynyň ileri tutulýan ugurlaryna we Durnukly ösüş maksatlaryna doly laýyk gelýän bu maksatnama geçen ýylyň noýabr aýynda Daşkent şäherinde kabul edildi.
UNODC-nyň Merkezi Aziýa boýunça sebit wekili Aşita Mittal Merkezi Aziýanyň ilatynyň howpsuzlygyny üpjün etmekde, parahatçylygy we howpsuzlygy berkitmekde, şeýle hem adam hukuklaryna hormat goýmakda umumy maksada ýetmek üçin bilelikdäki çäreleriň dowam etdiriljekdigine umyt bildirdi.
Forumyň ahyrynda gatnaşyjylar Ýyllyk hasabaty kabul ederler.
ORIENT
news
Surat:
