ÝB we Merkezi Aziýa ýurtlary özara ykdysady gatnaşyklary ösdürmegi maksat edinýärler
Ýewropa Birleşiginiň — Merkezi Aziýa ýurtlarynyň ministrleriniň 18-nji mejlisine gatnaşyjylar bar bolan çökgünçilikleri ýeňip geçmek üçin söwda we ykdysady hyzmatdaşlygy güýçlendirmek isleýändiklerini tassykladylar – diýip, Gyrgyzystanyň DIM-niň saýty duşuşygyň jemleri boýunça habar berýär.
Köptaraplaýyn gepleşikleriň çäklerinde Merkezi Aziýa ýurtlary üçin sebitleýin «Ýaşyl gün tertibi» maksatnamasy hödürlenildi, şeýle hem Merkezi Aziýa ýurtlarynda Ýewropanyň ýokary okuw mekdepleriniň şahamçalaryny açmak we bilelikdäki ylmy gözlegler boýunça synag taslamalaryny durmuşa geçirmek mümkinçilikleri ara alnyp maslahatlaşyldy.
Taraplar özara söwda dolanyşygyny artdyrmak, ýaşyl energiýany ösdürmek, ÝB-niň dürli maksatnamalardan netijeli peýdalanyp, kiçi we orta telekeçiligi goldamak babatynda anyk çärelere garadylar.
Ýurtlar howpsuzlyk meselelerini, hususan-da, Owganystan bilen baglanyşykly meseleleri, şeýle-de syýasy we diplomatik gepleşikleri dowam etdirmegiň zerurlygyny ara alyp maslahatlaşdylar.
Duşuşyga ÝB-niň Daşary işler we howpsuzlyk syýasaty boýunça ýokary derejeli wekili Žozep Borrell we Türkmenistanyň, Gazagystanyň, Özbegistanyň, Täjigistanyň we Gyrgyzystanyň Daşary işler ministrlikleriniň ýokary derejeli wekilleri gatnaşdylar.
ORIENT news
Surat: casp-geo.ru
