Türkmenistan we ÝB metanyň zyňyndylaryny azaltmak boýunça hyzmatdaşlyk etmäge ylalaşdylar
ÝB-niň Daşary işler we howpsuzlyk syýasaty boýunça ýokary wekili, Ýewropa Komissiýasynyň wise-prezidenti Josep Borrell anna güni Samarkantda geçirilen Ýewropa Bileleşigi bilen Merkezi Aziýanyň arasyndaky özara baglanyşyk boýunça maslahatda türkmen wekiliýetiniň ýolbaşçysy, Türkmenistanyň Daşary işler ministriniň orunbasary Wepa Hajyýew bilen ikitaraplaýyn duşuşyk geçirdi.
Borrell öz twitter akkaundynda: "Türkmenistanyň DIM-niň ministriniň orunbasary Wepa Hajyýew bilen ikitaraplaýyn we sebitleýin hyzmatdaşlygyň ähmiýetini, “ýaşyl” we “sanly” gün tertibiniň özgerýän güýjüni sebitlerimiziň bähbitlerini artdyrmak üçin ulanmagyň zerurdygyny ara alyp maslahatlaşdyk" – diýip ýazýar.
Ýewropa diplomatiýasynyň baştutany: "Biz metanyň global zyňyndylaryny azaltmak babatynda hyzmatdaşlygymyzy dowam etdirmekçi" – diýip, Türkmenistanyň Daşary işler ministriniň orunbasary bilen bolan duşuşygynyň teswiriniň üstüni ýetirýär.
ORIENT news
