Türkmen-Rus uniwersiteti tehniki ugurlar boýunça hünärmenleri we lukmanlary taýýarlar
Türkmenistan Aşgabatda döredilmegi meýilleşdirilýän Türkmen-rus uniwersitetinde tehniki we lukmançylyk ugurlary boýunça hünärmenleri taýýarlamaga gyzyklanma bildirdi, bu barada Russiýa Federasiýasynyň Ylym we ýokary bilim ministrliginiň resmi saýtynda Türkmen-Rus hökümetara toparynyň mejlisinden soň habar berdi.
Uniwersitetiň döredilmegi we şertleri barada hökümetara şertnamanyň deslapky taslamasy taýýarlandy. Bu bilelikde döredilýän uniwersitetiň başlangyç tapgyrynda iki tarapdan utgaşdyryjy ýokary okuw mekdepleri bellemek maksat edinilýär.
Täze uniwersitetdäki bilim maksatnamalarynyň rus standartlaryna laýyklykda durmuşa geçiriljekdigi sebäpli RF-nyň Ylym we ýokary bilim ministrliginiň buýrugy bilen tassyklanan hünärleriň we ýokary bilim derejeleriniň sanawy Türkmenistandaky kärdeşlerine gowşuryldy.
Duşuşykda taraplar Türkmenistanly dalaşgärleriň Russiýanyň uniwersitetlerinde bilim almagy barada hem pikir alyşdylar.
Russiýanyň hökümeti her ýyl türkmen dalaşgärleriň bilim almagy üçin belli bir mukdar bölüp berýär. 2022/23-nji okuw ýyly üçin jemi 250 sany orun berildi we geljekki ýyl üçin hem şol bir orun sanynyň berilmegi meýilleşdirilýär.
Russiýa Federasiýasynyň Ylym we ýokary bilim ministriniň orunbasary Natalýa Boçarowa öz çykyşynda Russiýanyň Ylym we ýokary bilim ministrliginiň Russiýanyň uniwersitetlerine okuwa girmek üçin Türkmenistanly dalaşgärleriň sanyny artdyrmak mümkinçiligine ýardam bermäge taýýardygyny aýtdy.
ORIENT news
Surat: redaksiýa arhiwi
