Germaniýa türkmen gümrükhanalaryny awtomatlaşdyrmakda hyzmatdaşlygyň geljekki mümkinçiliklerini öwrenýär
Türkmenistanyň Döwlet gümrük gullugynyň hem-de Söwda we daşary ykdysady aragatnaşyklar ministrliginiň hünärmenleri Germaniýanyň Halkara hyzmatdaşlyk jemgyýetiniň hünärmenleri bilen gümrük amallaryny awtomatlaşdyrmak boýunça mundan beýläkki hyzmatdaşlygyň meselelerini ara alyp maslahatlaşdylar.
Bu barada wideoaragatnaşyk arkaly geçirilen gepleşikleriň jemleri boýunça Türkmenistanyň gümrük gullugynyň resmi saýty habar berýär.
Ara alyp maslahatlaşmalaryň çäklerinde Germaniýanyň Ykdysadyýet ministrliginiň başlangyjy bilen 2023-nji ýylyň dekabr aýyna çenli durmuşa geçirilmegi meýilleşdirilýän ýol ulaglary bilen halkara ýüklerini daşama amallaryny sanly ulgama geçirmek boýunça taslama hödürlenildi.
Türkmenistanyň gümrük gullugynyň wekilleri biziň ýurdumyzdan üstaşyr geçýän harytlary we ulag serişdelerini gümrük dellallarynyň hyzmatlaryny ulanmazdan deklarirlemäge mümkinçilik berýän TIR-EPD ulgamynyň häzirki ýagdaýy barada maglumatlary bilen paýlaşdylar.
ORIENT news
Surat: transline.ru
