Türkmenistanyň we Özbegistanyň döwlet baştutanlary iki ýurduň halklaryny Dostluk festiwalynyň açylmagy bilen gutladylar
Türkmenistanyň Prezidenti Serdar Berdimuhamedow we Özbegistanyň Prezidenti Şawkat Mirziýoýew Daşoguz şäherinde Dostluk festiwalynyň geçirilmegi mynasybetli türkmen we özbek halklaryny gutladylar. Gutlag hatlary şu gün TDH habarlar gullugy tarapyndan çap edildi.
Goňşy döwletleriň baştutanlary festiwala gatnaşyjylaryň ählisine, şeýle hem iki dostlukly halklara berk jan saglyk, bagt, abadançylyk we gülläp ösüş arzuw etdiler. Özbegistanyň Prezidenti festiwalyň ýokary derejede guralandygy mynasybetli türkmen Liderine aýratyn minnetdarlyk bildirdi.
Iki gutlagda hem festiwalyň geçirilmeginiň iki halklaryň we döwletleriň arasyndaky dostlukly gatnaşyklaryň ösmegi üçin möhüm ähmiýete eýedigi nygtalýar.
«Türkmenistan bilen Özbegistan Respublikasynyň arasyndaky giňişleýin hyzmatdaşlygyň yzygiderli ösdürilmegi halklarymyzyň dostlukly gatnaşyklaryny pugtalandyrmakda möhümdir» — diýip, Serdar Berdimuhamedow aýratyn belledi.
«Iki dostlukly we doganlyk halklarymyzy has ýakynlaşdyrýan şular ýaly medeni baýramçylyklary bilelikde geçirmegi geljekde-de dowam etdirjekdigimize men pugta ynanýaryn» — diýip, Şawkat Mirziýoýew gutlagynda belläp geçýär.
Şeýle hem Daşoguz welaýatynda geçirilen bu festiwalyň türkmen we özbek halklarynyň arasyndaky ikinji dostluk baýramçylygydygy gutlaglarda aýratyn bellenilýär. Ilkinji festiwal 2010-njy ýylda geçirilipdi.
ORIENT habarlary
Surat: prezident.uz
