ÝB maýa goýum kuwwatyny Merkezi Aziýada täze sanly ykdysadyýeti döretmek üçin ulanyp biler
Ýewropa Birleşiginiň daşary işler we howpsuzlyk syýasaty boýunça ýokary derejeli wekili Žozep Borrell Merkezi Aziýa ýurtlaryna kömek etmek üçin dünýäniň beýleki döwletleri bilen ýakynlaşdyryp biljek täze “ýaşyl” sanly ykdysadyýeti gurmaga Ýewropanyň hususyýetçileriniň maýa goýum kuwwatyny ulanmak mümkinçiligini mälim etdi.
Bu barada 18-nji noýabrda Samarkantda geçiriljek iki sebitiň arasyndaky sanly, ulag we energiýa gatnaşyklaryny ara alyp maslahatlaşmagy meýilleşdirilýän ÝB we Merkezi Aziýa özara baglanyşygy boýunça Global Gateway Maslahatyna bagyşlanan Ýewropa Birleşiginiň Türkmenistandaky wekilhanasynyň ýaýradan tekstinde aýdylýar.
ÝB geografiki päsgelçilikleri ýeňip geçmek we döwlet tarapyndan edilýän hyzmatlary kämilleşdirmek, Merkezi Aziýa ýurtlarynyň bäşisiniň hem milli ykdysadyýetiniň ösüşini ýokarlandyrmak we diwersifikasiýa etmek üçin zerur platformalary döretmegi maksat edinýär.
Dünýädäki iň uly maýa goýujy bolmak bilen, ÝB 2021-nji ýyldan 2024-nji ýyla çenli dürli bilelikdäki taslamalary 390 million ýewro möçberdäki grantlar bilen üpjün eder, şunda 2014-nji ýyldan 2020-nji ýyla çenli aralykda Ýewropa Birleşigi 1,1 milliard ýewro serişde beripdi.
Türkmenistanyň Daşary işler ministri Raşid Meredowyň gatnaşmagyna garaşylýan Samarkantda geçiriljek duşuşygyň maksady Merkezi Aziýa döwletleriniň ägirt uly mümkinçiliklerini ýüze çykarmak üçin maýa goýumlaryna höweslendirmekden ybaratdyr we bu bolsa, ekologiýa, ykdysadyýet, ulag, energiýa, maýa goýumlary we beýleki ugurlarda sebitara hyzmatdaşlygyň möhüm tapgyrlarynda örän ähmiýetli ädim bolar.
ORIENT news
Surat: akipress.com
