Türkmenistanyň ýokary okuw mekdebine Ýaponiýa barada 50 kitap sowgat berildi
Ýaponiýanyň halkara taslamasynyň çäklerinde Halkara ynsanperwer ylymlary we ösüş uniwersitetine ýapon kitaplaryny sowgat bermek boýunça dabaraly çäre geçirildi, bu barada Ýaponiýanyň Türkmenistandaky ilçihanasynyň metbugat habarynda aýdylýar.
Çäräniň barşynda Ýaponiýanyň Türkmenistandaky ilçisi Ýamamoto Hiroýuki Halkara ynsanperwer ylymlary we ösüş uniwersitetiniň rektory Esen Aýdogdyýewe 53 sany kitaby we berlen neşirleriň sanawy bilen bilelikde sowgat berlendiginiň şahadatnamasyny gowşurdy.
Bu dabaraly çäre READ JAPAN Project taslamasynyň çäklerinde geçirildi, bu taslama Nippon Foundation gaznasy tarapyndan Ýaponiýa barada giň maglumatlary bermek we hyzmatdaş ýurtlar bilen dostlukly gatnaşyklary ýola goýmak maksady bilen, 2008-nji ýyldan bäri amala aşyrylýar.
Kitaplar iňlis dilinde ýazylyp, olarda Günüň dogýan ýurdy hakynda gürrüň berilýär. Türkmenistanda Ýaponiýanyň taslamasynyň çäklerinde gowşurylyş dabarasy ilkinji gezek geçirilýär.
ORIENT news
Surat Ýaponiýanyň Türkmenistandaky ilçihanasy tarapyndan berildi
